हे हउ दिना–भदरी,
तूँ दुनू भाय
चाहक संग भाङ्ग पीबि कऽ
भरि रहल छह पंजाबमे
सरदारक बखारी ।
आ एतय तोहर घरमे
कोनटा लग
कानि रहल छह
तोहर पाँच मनक कोदारि ।
हे हउ कृष्णा राम–सोबरन,
तूँ दुनू भाय
साउदीक बालू–पहाडपर
रोमि रहल छह हेँजक हेँज उँट
आ एतय सुन्न लगै छह
तोहर दौरी बथान
अर्ना भेल जाइ छह
तोहर अनेर भैँस ।
हे हउ भाय सलहेस,
तूँ परदेशक दरबज्जापर
दैत छह पहरा
ठोकैत छह सलामी ।
आ एतय
तोहर मायक आँचरमे
मुदइ गड़ौने छह नजरि
हे हउ दिना–भदरी,
हे हउ कृष्णाराम सोबरन,
हे हउ भाय सलहेस,
बाँझ भेल जाइ छह तोहर चौरी चाँचर,
सुन्न भेल जाइ छह गोहाली बथान
टुगर लगै छह तोहर देश ।
आबह घुरि कऽ
जल्दी आबह घुरि कऽ
अपने गामकेँ बनेबै पइन्जाब
अपने समाजकेँ बनेबै कतार
अपने देशकेँ बनेबै अमिरका ।
