रूपा धीरू - प्रसव–पीड़ा

प्रसव–पीड़ासँ छटपटाइत ओ

अइ कोलासँ ओइ कोला करैत

बोदरि छलि पसेनासँ,

किछु कालक पश्चात चौरीमे हलचल भेलैक

आ प्रसन्नताक लहरि पसरि गेलैक

ओकर बाप हाथमे राखल बहिंगाकेँ

खुशीसँ उछालि फेकलक दूर कऽ

ओ बड़ पोरगर नेनाकेँ जन्म देने छलि।

ओ बड़ प्रसन्न छल

ई सोचि

जे काल्हिसँ ई हम्मर

बाँहि पूरत, पँचपज्जी बोझ उठएबाक

सामर्थ राखत,

तखन फागुनेमे बेसाह लगबाक डर नहि रहत

प्रात भने गिरहतक खरिहानमे बोनि लेबाक लेल

बड़ हुलसगर मोनसँ पहुँचल ओ

हुनकर दलानपर बड़कीटा मोटर चमचमाइत छलनि

पता चललै जे गिरहतक पुतौहुकेँ

सातम महिना छियनि

दड़िभंगा जा रहल छथि

दुस्साहस कऽ ओ अपन बुधनी,

आ गिरहतक पुतौहुक तुलना कएलक

आ

बहिंगा ठामे गाड़ि देलक बोझपर

ओ गिरहतकेँ नेहोरा करऽ लागल—

“मालिक परसौतीक लेल दालि–चाउर

बड़ जरूरी छै

कने, बोनि ........”

“की बजलेँ ?”

ओ गरजि उठलाह— “सार नहितन

जतराक बेरमे तोँ .....

अपने भनसिया जकाँ

बूझैत छिहीक ?”